هذا الشاب الأسترالي اللي في الصورة اسمه
بوجارت لامبري وهو استرالي الجنسية ومسيحي عنده 32 سنة، وحسب كلامه لوكالات
الأخبار إنه قابل السيدة اللي معاه في الصورة في كافيه بالصدفة واسمها نورة وهي
عراقية الجنسية ومسلمة وعندها 31 سنة، ومنذ أن وقعت عينه عليها وحصل اللي مبيحصلش
عادة، حب من أول نظرة .. قرر يروح الكافيه ده كل يوم لحد ما يشوفها ويقابلها تاني،
وفضل الراجل رايح جاي كل يوم عالكافيه 6 شهور، وكل مرة يروح يسأل اللي شغالين: يا
جدعان نورة دي جت، يقولوله لأ يا أستاذ بوجا والله ما جت تاني .. ست شهور يا مؤمن
رايح جاي ومينمم تشارج رايح ومينمم تشارج جاي .. المهم تشاء الأقدار بعد الست شهور
يتقابلوا تاني ويطلب منها يشربوا قهوة في اون ذا رن بتاع استراليا، وهي بكل بساطة
وسهولة توافق، آه والله عادي يعني بتحصل، وبعدها بقوا أصحاب.
وبعدين هي بتحكي وبتقول إنها اعتبرته صديق
يعني لأن ليها أصدقاء كتير شباب يعني أو كما قالت نورة بالحرف يعني:
I kept it as friends. I grew up around Australian guys and had plenty of
friends, so there was no problem with that
فهو كان زيه زيهم، بس بالنسبة لمستر بوجا هي
مكنتش زيها زي غيرها، وإلا مكنش فضل 6 شهور مستنيها تظهر تاني فنفس المكان ..
يرجع المايك لبوجا تاني ويقول: عمري ما
تخيلت أحب وارتبط بحد من الشرق الأوسط أصلا، يعني هاخد حتة مارون جلاسيه استرالي
وخلاص، بس الأخت نورة كان لها رأي آخر في قلب بوجا، ويقول بوجا: كل ما قضينا وقت
أكتر سوى كل ما حبيتها أكتر وحبيت أعرف ثقافتها ومعتقداتها وأنغمس فيها أكتر، وبعد
شوية وقت قرر بوجا إنه لو عايزها لازم يبقى زيها، يعني لازم يغير دينه ويعتنق
الإسلام .. وقد كان، قرر بوجا وبدأ في دراسة القرآن ليل نهار، وفضل يدرس القرآن
بغرض فهم الكتاب اللي حبيبته بتؤمن بيه ده ... لحد ما اعتنق الإسلام عشان يكون مع
حب حياته.
أسرة نورة عارضت طبعا لما عرفت، ولما بوجا
طلب يقابل والد نورة، أبوها عمل حركة، قالها أنا مسافر 3 شهور لما أرجع لو لسة
موجود هقابله، وكان أبوها عايز يعرف هل بوجا ده بيلعب وهيزهق لما الراجل يخلع 3
شهور ولا هيتسناه ويرجعله تاني .. وتقول نورة إن خلال ال 3 شهور دول بوجا كان كل
اللي بيعمله إنه بيحسن علاقته بأهل نورة، أمها واخواتها وبيعرفهم ويعرفوه أكتر،
لحد ما هو قال إن والدتها بقت زي والدته بالظبط بالنسباله .. وفعلاً الراجل سافر 3
شهور ولما رجع لقى بوجا مستنيه وبيطلب مقابلته تاني، بس المرة دي مراحش لوحده، راح
وخد عيلته معاه، أم بوجا وأبو بوجا وكده يعني .. وبالفعل طلب بوجا إيد نورة من
والدها واتجوزوا بقالهم حوالي 4 سنين وعندهم بنوتة اسمها جميلة عنده 3 سنين ..
وبوجا بيكمل كلامه ويقول: إن لو بنته طلعت
بنص اخلاق مراته واحترامها لنفسها هيكون أسعد راجل في الدنيا
تعليقات: 0
إرسال تعليق